STAR SUSS

What a gwaan massive? Oonu good? Mi say all now mi still a celebrate mi birthday from lass week Friday! An fi go Lucea lass week, mi go do mi hair and cut off everything like di old Toni Braxton hairstyle. Mi hot yuh backfoot!

Lucea and Club 300 massive, oonu sell right aaff! See oonu again at Club 300 on Friday December 19, fi wi end of year "All Star" party wha name "Frost Bite". This week mi a announce three set ah people who confirm already: One Third, Senita from Magnum Kings and Queens, and D.A.J. Nex week oonu know di ress! Alright suss time. Link mi pon hotgalcherry@hotmail.com.


ENDORSING THE WHISPER 2000

Lookyah Nikki Z, mi love yuh; yuh ah mi fren an everyting, but wha di backfoot really happen yesterday morning (again)? So soon woman? Aftah mi lobby and lobby and cuss fi dem put yuh back cause mi feel like yuh did gone fi too long; loeth and beholdeth as Blak Ryno wudda say: "seeeet deh!" Yuh ah stress mi out man! Mi haffi a siddung pon di edge a mi bed a pray say nuttin nuh go wrong when yuh deh pon air.

Yuh nuh go tru di sinting dem ah yuh yard when yuh ah prepare di mix dem? If yuh dare tell mi "yes" mi haffi go buy and ship one Whisper 2000 hearing aid to yuh immediamente! Lookyah man, nuh feel no way cause ah di same ting mi wudda do wid Kaboom, Mucho Mucho, Witch, TAE or Ragashanti. Mi cyan tek di stress.


ADDI, ADDI, ADDI

Yes mi haffi call yuh name three time cause ah three time di c**k crow innah di Bible before Peter deny Jesus. Mi say yuh grieve mi spirit when me read yuh comment dem bout Jesus and God. Ah fi yuh bizniz wha yuh waah do wid Jesus and if yuh believe say yuh a devil, but nuh drag di whole human race inna yuh war wid Jesus wha yuh a try justify bout Jesus inna "WE" mind and ah "WE" create Him. Not a bit ah dat! Change yuh speech: it inna fi YUH mind. Mi might rail to one an two ah yuh song dem. But yuh cross di bordah line mah brotha. You march gwaan armed wid yuh tattoo dem inna warfare wid principalities and powers, but nuh come pluralise nuttin like WE and YOU hol' no conversation bout dat an yuh a issue press release on behalf a di nation.

Wha you waah do inna your ting ah juss dat - YOUR ting; but nuh when yuh inna one influential position whe di young yute dem a gih yuh a listening ear. Tek heed Addi.


ANDREA AND OBAMA

Massive, mi a tell yuh say Jamaicans deh everywhe! An oonu know from when mi fi show oonu di pic? See it yah: is a past student of Glenmuir High School by the name of Andrea Oliver and USA president-elect, Barack Obama, during him campaigning when dem tek a break fi some pictures. Oonu did know say quite a few Jamaican deh pon him campaigning team? Truss mi, we sell off: we are a nation of great people! Nuttin cyan stop wi if wi have a goal! Mike Bolan bless up for sending your past classmate, Andrea's pic!


MI WAAH FI KNOW:


Wha Baby Tash mean say dem nevah tell her bout dis year's Kings and Queens launch and dat's why she did absent?


Is it di whole Empire whe nuh believe inna God or a juss Addi? A wonda if dem believe say him a di devil too?


Massive, tek care! Latah!