Busy Signal - file photos

Mi not even go talk bout Killa new, yet, old charge! Lawd! But lookyah, how Keyshia Cole did sound so man? She tone deaf? She and Foxy Brown ah par? Mi nearly dead when di woman start spoil Sent From Heaven, have mercy! Di horror, di horror, such wretched horror! But anyway, wha mi need fi talk bout a di fool-fool interviewer wha Mr Lapsided Afro-Puff did have a wuk wid him. Now mi come back up and siddung a watch di whole a di re-cap, and loeth and beholdeth, di interviewer from hell say wi muss pree har T-Pain interview.

So mi siddung and wait and di ooman come a ask di man pure ediot question: 'What should we expect from you tonight?' Den di followup question: 'What are you expecting from the Jamaican audience tonight?' Ah wha di backfoot? Yuh did nervous? My girl, di man who come een like di American Elephant Man wid him whole heap a weird clothes and antics, come siddung infront a yuh look normal inna T-shirt and dat ah nuh one a yuh question dem? How him look so plain tonight? Not to mention say di man come a one JAMAICAN reggae show an yuh nuh ask him which Jamaican acts him familiar wid and ah look forward fi see? If him see none who him like if him wudda collaborate wid dem? My girl, red lipstick and blue eyeshadow does NOT a journalist make! Hush.