SEAN KINGSTON AND DI GENIUS FI TEAM UP?

Eeeh? Ah dem ting deh a gwaan? People mi hear say Sean Kingston reach out to Stephen pon Twitter an say him waah link up and possibly work pon summen. Him ah go do dat when him come out yah fi di concert tomorrow or him a plan fi a next trip? Wha Stephen a say? Mi feel him fi dweet. Cause Sean have di US mainstream appeal an' Stephen have Jamaican dancehall lock. Two ah dem have summen wha can help di nex'. Dweet Stephen dweet! Wi want one hot dancehall song pon di Billboard charts, cause mi nuh know a wha deh happen, but di one time wi mek di chart every five year, ah always fi two or three week. Mi nuh know; wi inna one sad state. Dweet Stephen dweet!

Sean Kingston - Contributed

What a gwaan massive? Oonu can believe di destruction inna Haiti? No sah, it serious. Mi proud fi see people ah rally up and gih tings fi sen' off go help di Haitian dem. Speakin' of which, mi hope when mi see people a beg an bawl and wi see elderly people ah live undah cardboard pon TV an' literally ah bawl fi help, mi hope wi feel di same sense ah urgency fi go help dem, especially since shipping ah go much cheaper. Henheewaay, suss time. Link mi pon hotgalcherry@hotmail.com.

NO SAH, DIS AH MORE DAN CROSSES

Lawd help wi! Mi hear say "dem" people deh tek Busy song One More Night an' tun it inna dem theme song! Mi nearly keel ovah. But if yuh ah hear summen wha sound like one man name ah call inna di song, di people dem have all right fi tek it tun dem national anthem. Lawd! People mi hear say Busy sick ah people ah ask him bout di song, but we haffi ask. An smaddy pinch mi a say him re-record di song. Mi nuh know if a true but if him indeed re-do it him need fi mek sure him start sing and shout like him deaf ears Betsy when him reach deh part deh: "BBBAAAABBBYYY, BBAAAAABBBYYY, gimmi one more chance." What a crosses pon yuh when yuh deh ah stage show and some ah "dem" start scream bout "Awww ma Gaawd! That's totally my song!" Woii, mi body!

LISA AGAIN

People, is like Lisa juss know wha name Twitter. One piece-ah drama! Everyting she chat. But mi a say dere is a time an' place fi everyting. Inna di midst ah di trauma over Haiti an' everybody a try get busy fi help, including Wyclef, cause oonu done know di man a Haitian, dis girl aftah di man tweet summen bout Haiti, she go tweet (message) back to di man ah say, "link up". Now oonu tell me if she alright or wha. Unless she did start one Haitian rescue mission or summen, which mi doubt, wha dat fah? Some people jus nuh know time and place fi tings.

MI LIKE IT BUJU, MI LIKE IT

Buju Banton - Contributed

Speakin of di tragedy inna Haiti, Buju reach out to dem and donate over one thousand US dollah and some clothes and dem tings deh. Mi naw tell no lie, mi impressed. Cause if ah did mi inna jail ah foreign wid a bag a drama a hang ovah mi head, mi nuh know when mi wudda sane or alright enough fi still a tink bout odda people sufferin inna one distant land. When mi really tink bout it, it definitely tek strength fi stop tink bout fi him problem dem an' help odda people in need. Mi like it.